Hoxe de novo estivemos nas rúas. Nin Reválidas nin LOMCE

revnon

Manifestación-do-26-de-outubro-non reválidas nin LOMCE en Vigo, Ferrolterra, Costa da Morte, Compostela, A Coruña, Lugo, Ourense, Pontevedra, Vilagarcía…

Cando un País ten a desgraza de ter gobernos que non escoitan aos seus cidadáns, que non entenden cal é o mandato que se lles dá, que é para o que están aí e non para outra cousa; neses casos non queda outra máis que berrar, berrar polas nosas esixencias, polas Leis que queremos, por como queremos distribuír e organizar o que é de todas e de todos.

Cando o goberno dun País ten a intención de botar fóra a moitos de nós, e non cre que os dereitos non dependen de ningunha condición diferente ao propio feito de sermos individuos que vivimos nun espazo común; teremos que defendernos e defender tamén aos que non poden facelo por si propios e aos que aínda non acadaron a idade para o poder demandar como nós lles ensinaremos.

Cando a xente do noso País temos a desgraza de ter enfronte a un grupo de gobernantes que rexeitan escoitar, que negan a voz plural e compartida, que pretenden consolidar os privilexios e as garantías duns poucos e que por riba queren facelo a costa da maioría que sofre as súas políticas clasistas, entón hai que saír ás rúas pacificamente, hai que baleirar os colexios, hai que ir da man os vellos cos novos, e hai que berrar máis, defenderse máis, afianzarse máis.

Iso, outra vez, fixémolo o 26 de outubro.

Volvemos a berrar as mesmas ladaíñas, a coller as mesmas pancartas; volvemos a dicir que a Lei da discriminación educativa non é a nosa Lei, que non a queremos e que non a imos admitir, aínda que pasen os meses e os anos.

NON QUEREMOS REVÁLIDAS, nin os nosos fillos e fillas, nin nós, que somos as súas nais e pais e queremos o mellor para eles; e como non as queremos imos pelexar ata que ese mal pesadelo desapareza dos seus soños, e poidan continuar a súa vida co camiño aberto, coas oportunidades todas, coas súas arelas intactas; e coa colaboración de todos e todas para construír neles o futuro da nosa sociedade.

Hoxe estivemos nas rúas, e volveremos cantas veces sexa mester, retomaremos as consignas e as bandeiras, levaremos escritos e cartaces, porque ninguén, ninguén, ten o dereito a decidir quen queda atrás e quen pode continuar, o único que todos temos é a obriga de traballar para que ninguén quede apartado.

Por iso, non queremos reválidas, non queremos atrancos, non queremos diferenzas, máis ca iso, non imos consentir que as haxa.

Deixar unha resposta